漫步堅尼地道

yinghey

	對迎希黎講，星期六嘅偶然行上堅尼地道，好正～因為好多歷史可以從中講下～又可以搵到古蹟留下影多翻查下資料～由於仲係鬼月～四人隨行時～我都係強調成條路好似好多煙霧咁～當然～佢地睇唔見～鬼怪野就唔多講～分享下條路～ 堅尼地道好長～連接灣仔峽道至花園道～沿途都屬於富有華人（精英）聚居之地～呢段路於二次大戰時日本侵略頭幾日簡直係人間煉獄～當日軍轟炸灣仔～山下嘅人往山上跑～因為山下大部分道路都被堵塞～得堅尼地道勉強可以東西通行～於是成為當時華人逃亡嘅主要路線 堅尼地道４２ａ及ｂ出入口就有一座好似軍事堡壘建築物～最初我以為係戰時碉堡～行近就見到門山有英文刻字～原來係香港電燈公司嘅變電站～當時仲以為座建築用緊～後來睇番網上資料～早就已經空置～座建築主要由紅磚組成～門口刻意起得高啲～目的因應昋港潮濕多雨容易水浸而設～ 堅尼地道其中一條自然石澗，平時只係小水坑～因為早上落過大雨～於是形成小瀑布～你認為呢張相有冇見到啲乜呢？ 聖若瑟徑明渠，竟然有老鼠！ 聖若瑟書院（呢張係網上圖片，當日無影低～） 堅尼地道６４號～個門面好神秘～大家都話好似古代「城堡」咁～我當時唔多肯定話「呢座好似係顏城坤大宅」～之後再查～正確～ 沿路上去～就會見到顏城坤大宅全貌～山下只係個門口黎～都好有氣勢～ 顏城坤係邊位？中華巴士創辦人，曾經係３０年代做過東華三院主席～係當時香港數一數二嘅社會賢達～ 堅尼地道１號雍仁會館～共濟會香港總部～其實我都唔知裡面係做乜～（因為只招待會員～一般人應該唔入得） 百年歷史嘅山頂纜車近堅尼地道站嘅鐵橋～ 最後順道去埋兵頭花園睇銅像～ 英皇喬治六世像，立於１９４１年，係由英國倫敦運黎香港，慶祝香港開埠１００周年。不過豎立於皇后像廣場唔係好耐，日軍侵港，呢個像就連同維多利亞女皇像、匯豐銀行銅獅成為佢地嘅戰利品，仲拎左去東京打算熔黎做武器～對英國政府黎講係一個恥辱～所以戰後英國政府第一時間就係追尋銅像下落～最初係無下文～之後清理戰時物資盤點～係某個倉搵到出黎～歸還後～原本擺埋一齊嘅銅像各散東西～維多利亞女皇像送左去銅鑼灣～而呢個就放在兵頭花園～剩昃臣像仲係中環～

紀文思

	支持！琴日成個活動都好舒服

yinghey

	紀文思 發表於 2018-9-9 15:05 支持！琴日成個活動都好舒服 港島區勝在歷史價值～好多地方仲保留舊有殖民地味道～所以我先至咁鍾意行～

馬仔

	紀文思 發表於 2018-9-9 15:05 支持！琴日成個活動都好舒服 迎希成日見到「霧」，可能佢唔多舒服

紀文思

	馬仔 發表於 2018-9-9 16:42 迎希成日見到「霧」，可能佢唔多舒服 可能要移交海島治療 哈哈哈哈

馬仔

	紀文思 發表於 2018-9-9 20:30 可能要移交海島治療 哈哈哈哈 唔係咁既意思，唔好曲解我

關二哥

	又行埋啲猛鬼路

紀文思

	關二哥 發表於 2018-9-9 23:42 又行埋啲猛鬼路 二哥又唔黎

紀文思

	搵日要再行！

yinghey

	紀文思 發表於 2020-2-21 23:47 搵日要再行！ 而家港島北岸高危～等風頭過左再計劃～