灣仔夜遊見鬼記

yinghey

	７月１３日，雖然我參加嘅係鬼故歷史團，借都市傳說包裝，實際係介紹灣仔的歷史～不過咁，平時睇得書多，資料話就係咁話啫，段歷史到底係點，竟然靠班「兄弟」印證到部分～令我對今次旅程好深刻～遊完各處之後，團友更有興趣知道我地遊歷嘅地方，我究竟見到乜，結果係地鐵站圍圈時就一五一十同佢地分享～同場其實亦有陰陽眼人士可以證實～ 好啦～紀文思呢個老灣仔講左唔少野～我亦印證唔少野～而且係今次旅程更發現有趣嘅現象～究竟同啲鬼有無交感？就要好睇空間有冇連接起黎～今次竟然可以見到「平行時空」同「真正連接」兩種處境！好正！ 由於旅程上唔畀影相，我就唯有從網上搵相片講下我當晚見到啲乜～ 當晚行左唔少景點：灣仔修頓球場、灣仔舊街市、灣仔舊郵政局、聖方濟學校及光明街、洪聖古廟、南固臺及聖璐琦書院、日、月、星街及星街萬茂里伯公廟～

yinghey

	修頓球場－開燈一個樣，關燈另一個樣 修頓球場可謂係灣仔嘅明堂位，２０世紀３０年代就已經存在。上圖左方就係戰後嘅修頓，而右方反而先至係４０至４１年仲未打仗前嘅修頓。在二戰時日本仔佔領香港時，係灣仔殺左唔少人，老街坊都知道修頓球場係一個屠場，專門畀日軍亂咁殺軍民。連同隔離原本係貝夫人健康院嘅灣仔區政所打人、毒針殺人等～呢個地方早就加添唔少怨氣～５０、６０年代，居民就傳來閂燈後嘅修頓球場，經常人頭湧湧～但永遠都聽唔到啲咩聲～就算聽到聲，或者都係啲慘叫聲～到８０年代之後，看台男廁成日發生道友斃命嘅案件～猛鬼之說不逕而走～係呀～閂燈之後，除左觀眾都唔知係人係鬼～都總係坐無虛席，甚至見到打球個啲球，原來係人頭！（因為日本仔用軍刀斬平民頭嘛！） 千禧年代，政府翻新修頓球場，雖然設施多左靚左～但鬼故傳說似乎未有平息嘅跡象。更有趣嘅係～政府似乎都願意同鬼玩遊戲～係球場門口整個「破地獄」定「五鬼運財」嘅藝術圖案（仲要整成７個人仔，仲唔似日本法師落詛咒？！）～ 當晚係修頓人比較旺～所以見人多過見鬼～ 貝夫人健康院～戰前戰後都係健康院～日佔期間係灣仔區政所～負責日常民政事務同防疫工作～ 不過所謂防疫～都好難講係真係假～有傳防疫注射係生化武器實驗黎～不過就算唔係～都唔知佢地啲疫苗質量係點～

米奇老味

	有冇試過俾「朋友仔」評頭品足？

yinghey

	米奇老味 發表於 2019-7-17 19:07 有冇試過俾「朋友仔」評頭品足？ 有，個次係做緊野返通宵，畀個「細路」笑

yinghey

	南固臺、山坡臺上的聖璐琦書院 如今南固臺雖然無被清拆，但去路已經被封，而家連門口都見唔到喇～呢座西式大宅～有指曾經係日軍慰安所～不過屋主杜仲文一直住到１９４３年病死為止～所以真係要做慰安所嘅～大有可能就係１９４３年之後～佢前面仲有座千歲花壇（館），９０年代已經拆左～係戰前千歲花壇就係日本特務交流情報嘅妓院～ 至於山坡臺上嘅聖璐琦先至係今次灣仔遊嘅主角～而家圖片睇就日光日白都暗暗咁～個晚係成條山坡臺都係無路燈～佢係條長樓梯，中間有個彎位～再上啲先至有燈光～竟然係書院崗亭嘅燈黎～但已經無保安當值～ 一開始行個陣其實成條樓梯都有鬼～但初段至彎位嘅呢堆無乜惡意～甚至我地一行十幾人上去個陣，佢地讓路畀我地～係怕左我地啲陽氣～但過左彎位～我同陰陽眼人士上得較為近閘口位，就知道樓梯頂有堆唔係善男信女嘅鬼～我就見到一團團黑影～感覺到佢地帶有惡意同攻擊性，正警告我地唔好再上去～據知以前呢度曾經發生過掟人落樓嘅事故～０３年時有班人去探險時就有女仔見到閘口上面個窗有人向佢揮手～嚇到佢地同行幾個都失哂控，要報警處理～到實地睇時我係幾驚喜～因為無估到間書院仲係度未被拆～亦印證到呢間野猛鬼嘅原由～可能係因為被丟空太耐～加上周圍都拆哂～呢帶本來好多樹可以供佢地修煉～而家只剩書院可以棲身～我相信入面應該有鬼王住係度～唔係就唔會係門口見到呢堆「地踎」～

yinghey

	灣仔舊郵政局 好有趣～間局唔係有鬼～而係講緊單鬼郵差～話說戰後郵局側門經常深夜出現一個郵差去派信～收到信嘅人通常都會收得一堆白紙～之後就會遇上不幸～輕則都係扭親跌親～重則被車撞死～或急病意外身亡～因為街坊一傳十～十傳百～一時搞到人心惶惶～ 當晚阿導遊講緊呢單野時～我就見到側門有道氣出現～不過唔係個位鬼郵差～我反而更注視灣仔峽道上個條樓梯～叫做賢華臺，個處我見到唔少「街坊」～都係係樓梯坐下企下～似以前啲居民入夜出黎乘涼、閒話家常～就算係真正街坊行上去～都會不自覺穿過呢堆另類街坊～彷彿係兩個時空～但重疊於同一空間～ 其實一啲都唔奇～如果你睇番５０年代灣仔郵局嘅相片～就會知道賢華臺幾十年黎變化唔係好大～可能因為咁死左嘅老街坊都會返黎坐下～

yinghey

	灣仔舊街市～～賣人肉傳說 １９４５年《香島日報》報導～灣仔街市有肉檔賣嘅係人肉～負責人畀警察拉走～但佢嘅命運係點～無人知 之後就傳出灣仔舊街市好猛鬼嘅傳聞～無錯～舊街市時代個樣好陰森～加上經歷左戰爭附近死人太多～自然有呢啲故事～ 而家街市已經變成豪宅個正門口～同當年陰森樣完全唔一樣喇～但就失去左古跡嘅意義～ 愛德華時代包浩斯建築特色～簡約、直線～空間高且大，通風一流～係２０世紀３０年代簡約主義嘅代表作～而家香港剩低舊中環街市都係同風格建築～ 按：呢處早已無鬼～

關二哥

	你真係去捧場

yinghey

	日月星街、聖佛蘭士街及光明街～ 呢個係光明街休憩處，大家見到張相後面大廈左角落係有間油漆行～呢度其實無咩故事～導遊只係講緊聖方濟學校一帶戰前已經掘到唔少骸骨～懷疑就係鼠疫時因為燒唔切嘅屍體埋係呢度～當年灣仔近山了無人煙～係呢個地方～我當晚所見係好多「人」～啲「人」做緊乜？係油漆行門前排隊等買野嘅有～公園內行行企企又有～總之好多好多「人」～但同樣似係「平行時空」咁～佢地唔係好察覺到我地嘅存在～ 日、月、星街「死」字？ 傳聞話日、月、星連同附近共六條街，係地圖上形成個「死」字，令呢帶猛鬼嘅本身更顯陰森～不過更恐怖嘅唔係個死字，而係以下講嘅地方～ 星街防空洞門口，伯公廟上紅布傳聞～ 右圖係十幾年前嘅樣～盛傳隔離市建局重建工程完成後～為左遮醜而加塊紅布～但街坊就傳出話塊布係一位高人寫嘅暗符，目的係鎮惡鬼！無錯～係惡靈！左圖係而家個樣～無左塊布～唔知啲惡鬼仲會唔會出黎嚇街坊？ 不如我講下當晚我見到乜～一啲都唔誇張～當我地黎到呢處，我從上而下望左一遍，喃喃自語話「咩事啊！」～我見到係好多好多白影、黑影，鐵架上同廟後都滿滿係鬼～導遊有提及～因為後面係防空洞～當年灣仔大轟炸～呢度都受到襲擊～洞口炸死唔少人～所以戰後街坊就夾錢起左呢座伯公廟一心想平息亡靈嘅怨氣～不過伯公力量有限～之後應該有唔少法師曾經黎呢度搞法事～ 你以為搞完法事就無事？錯喇～我黎到此處時～呢堆怨靈嘅心態係：「又黎呀？！唔好搞啦～唔好理我地啦～唔想同你地傾呀，由得我啦～」佢地死得唔多甘心，而且怨氣好深～過去啲高人係想超渡佢地～但怨靈內心唔化又點渡得走丫～結果變成了劃出個結界圈住佢地～而家走又走唔到～陰氣就越黎越重～ 從兩張相片比較下廟後個啲竹樹就知道一二，當年好似話係種黎隔住啲亡靈唔畀佢地出黎～十幾年前仲好壯～但而家就無用～好瘦削～啲竹尖仲發黃～似乎擋唔起煞～再種新嘅都唔會有用～只能話～佢地或者唔會傷害到人～但係佢地嘅負能量係對隔離大廈～尤其成日用呢個出入口嘅居民～精神或者健康會有影響～長遠的確唔係幾好～點解決？只好剷左後面座山同防空洞啦～當然～無可能～

yinghey

	最後一站嘅東城戲院－全院滿座 而家已經變成東城大廈好多年～不過我都唔知係咪建築師開嘅玩笑～其實佢由地下至三樓～外形格局同當年東城戲院一模一樣～而東城戲院之前係萬國殯儀館～只係維持左１４年就易手～座建築改建一下就用做戲院～自自然然就話猛鬼啦～盛傳個女廁有女鬼嚇觀眾～亦有話男廁見到繡花鞋～間戲院明明無乜客～但入到去竟然全院滿座～到底係人睇戲定係鬼睇戲？ 我揀左東方影嘅呢張相～中間個門應該就係當晚我地駐留聽導遊講嘅地方～個度其實係上左一段樓梯再直行番落去嘅廁所黎～企係入面係特別凍，因為有冷氣～不過重點唔係呢度～而係當導遊講緊殯儀館同戲院嘅事跡時，我就感覺到有野係佢後面～但我睇唔到～只係感覺到～感覺到佢好似認同緊導遊講解嘅野～事後陰陽眼人士表示，當時係有隻野由地下走上來，企左係導遊旁邊～好奇聽緊佢講野～ 當時我仲衰衰咁笑住望導遊～佢就窒一窒話「有咩好笑～唔准講我知」 按：因為當時導遊每講一句，後面就會噴一下好似醫院嘅消毒劑味道～事後有團友記憶都聞到，我就話～如果係因為廁所傳出黎～理應係持續嘅味道，唔會導遊講一句先噴一下～好明顯有鬼玩緊野～所以我先詭異咁對住導遊笑～