張廿蚊道歉未息憤 網民籲杯葛「贊助商」

yinghey

張廿蚊道歉未息憤 網民籲杯葛「贊助商」

【明報專訊】最近多咗個新花名「張廿蚊」嘅張宇人，噚日出嚟向市民道歉，不過就有人覺得佢死口唔認錯，仲講到好似有傳媒「誤解」佢咁，所以網民依然拒絕收貨，仲繼續惡搞佢。有人就幫張宇人起底，仲搵埋佢參選時申報嘅捐款名單，睇吓有邊口的餐飲業捐助佢，呼籲網民唔好去幫襯，如果呢口的舖頭生意大跌，真係多得張宇人唔少。

參選籌款名單遭起底

　　Emily發現喺高登討論區度，有網民貼出曾經捐助過張宇人嘅餐店名單，好多仲係大型連鎖食肆，好似扒王之王、福苑集團、蛋撻王、聯邦酒樓、新光酒樓等。有人就呼籲要杯葛呢口的食肆，等佢口地一齊感受吓民間疾苦。

　　咁樣「株連」他人，Emily就覺得唔多公平；不過，就有網民好認真咁計數，睇吓究竟時薪20蚊要做幾耐，先可以買到樓。有人計過如果要買成7萬蚊一呎嘅天匯，就要做9400年先可以；有人就話20蚊就算買到一個麥當勞特價餐，但都搭唔到車，希望張宇人將心比己，體察吓班貧苦大眾啦！

－－－－－－－－－－－－－－－－－－－－－－－－－－－－－－－－－－－－－－－－－－－－
真係一個不折不扣嘅功能組別議員∼２０蚊一個鐘∼由將軍澳出中環最平已經冇左１１蚊２毫∼荒佢ｕｐ得出低處未算低∼咁嘅態度唔怪得早日聲討要求摺埋功能組別∼

杜泰

張廿蚊,這個名字好怪,感覺好刻薄......
民主萬歲!